Family Day Sa Maa Christian Learning Center Nagmalampuson

Taliwala sa makusog nga bunok sa ulan nagmalampuson gihapon ang gipahigayong Family Day sa Maa Christian Learning Center sa Crocodile football field dili pa lamang dugay.
Gipahigayon sa MCLC ang Family Day aron hatagan ang mga estudyante niini kauban ang ilahang pamilya ug tsansa nga mag bonding ug mas magsuod pa sa usag-usa.
Nagpahigayon ug nagkadaiyang duwa ang MCLC aron hatagan ug kalipay ang mga estudyante niini ug ilahang mga pamilya.
Nanghatag sad ug gasa ang MCLC pinaagi sa raffle sa mga pamilya nga nilahutay taliwala sa makusog nga uwan nianang adlawa.
Nagtigi ang lima ka tims nga gilangkuban sa green, yellow, red, violet, ug blue sa nagkadaiyang duwa sa usa ka adlaw nga aktibidad.
Wala sab nagpatarog ang mga estudyante sa bunok sa ulan ug nagpadayon sa pagkiay-kiay sa kontest sa cheerdance.
Human sa usa ka adlaw nga aktibidad nahimong kampeon ang Violet Thundervolt team nga gigiyahan ni Charies Montellano ug Cecile Bornea-Develleres Salvan.
Nakuha sa Green team nga gigiyahan ni Jerome Turno ug Mercy Bacus ang ikaduhang puwesto.
Mapasalamaton kaayo si MCLC administrator Edwin Zafra sa mga niapil sa family day taliwala sa ulan ug naglaom kini nga mas mamahimong suod ang mga ginikanan sa mga estudyante human sa maong aktibidad.