28 Ka Boy Scouts sa Maa Christian Learning Center Niapil Sa BSP Jamboree sa Malagos

Biente utso ka mga Boy Scouts sa Maa Christian Learning Center ang niapil sa bagohay lamang nahuman nga Council Wide Jamboree sa Malagos, Baguio District, Davao City. Ang Jamboree nga giapilan sa sobra 3,000 nga boy scouts sa tibuok Davao City gipahigayon niadtong October 12-16 ug gipasugdahan sa Boy Scouts of the Philippines.

Ang mga boy scouts sa MCLC nga nahimutang sa Bugac, Barangay Maa gilangkuban sa grades 4,5 ug 6. Gipahigayon ang jamboree aron bansayon ang mga boy scouts aron mamahimong responsableng miyembro sa komunidad.

Daghan mga aktibidades ang gihimo sa BSPhilippines aron mamahimong malampuson ang jamboree subay sa tema Growth and Stability. Ang upat sa dili malimtan nga aktibidades mao ang Back to Basics diin gitudluan ang mga boy scouts unsaon manginabuhi nga walay mga gadgets sama sa pagsugba sa itlog, Go Green diin gitudluan ang mga boy scouts unsaon pag-alaga sa atong kinaiyahan, Challenge Valley usa sa pinakalingaw nga aktibidades diin ang mga boy scouts gihatagan ug tahas nga mo-agi sa challenge courses diin gikinahanglan nila nga mokamang ug moambak, Malagos Expedition diin gihatagan ang mga boy scouts ug higayon aron malibot ang kalasangan sa Malagos.

Puno ug kalipay ang mga boy scouts sa MCLC sa ilahang partisipasyon sa Jamboree ug dili na sila makahulat nga moapil nasad sa susamang okasyon sunod tuig.