18 Ka Boy Scouts sa Maa Christian Learning Center Niapil Sa BSP Jamboree sa Malagos

Dise utso ka mga Boy Scouts sa Maa Christian Learning Center ang niapil sa bagohay lamang nahuman nga Council Wide Jamboree sa Malagos, Baguio District, Davao City.
Ang Jamboree nga giapilan sa libuan nga boy scouts sa tibuok Davao City gipasiugdahan sa Boy Scouts of the Philippines Davao City chapter.
Ang mga boy scouts sa MCLC nga nahimutang sa Bugac, Barangay Maa gilangkuban sa grades 4,5 ug 6. Gipahigayon ang jamboree aron bansayon ang mga boy scouts aron mamahimong responsableng miyembro sa komunidad.
Daghan mga aktibidades ang gihimo sa BSP Davao City chapter aron mamahimong malampuson ang jamboree. Ang dili malimtan nga aktibidades mao ang Challenge Valley usa sa pinakalingaw nga aktibidades diin ang mga boy scouts gihatagan ug tahas nga mo-agi sa challenge courses diin gikinahanglan nila nga mokamang ug moambak, Malagos Expedition diin gihatagan ang mga boy scouts ug higayon aron malibot ang kalasangan sa Malagos.
Ang delegasyon sa MCLC gipangunahan ni Jerome Turno, magtutudlo sa grade 5 ug lumad na taga Malita, Davao Occidental.
Suma ni MCLC administrator Edwin Zafra kada tuig gayod moapil ang eskuwelahan sa Jamboree kay kini dako dyud ug tabang sa lalakeng estudyante nga mahimong responsableng miyembro sa komunidad.
Puno ug kalipay ang mga boy scouts sa MCLC sa ilahang partisipasyon sa Jamboree ug dili na sila makahulat nga moapil nasad sa susamang okasyon sunod tuig.