Maayong panerbisyo ni Mark Galvez sa Barangay Communal ipadayon sa misis niini

Aron magpadayon ang kalambuan ug kaayuhan sa Barangay Communal, Buhangin, Davao City nag desisyon ang misis ni Mark Galvez, kasamtangang kapitan sa maong barangay nga modagan isip hulip sa pinalangga niining mister sa umaabot nga Barangay ug Sangguniang Kabataan election karong Octubre 30.

Si Joy Scalercio ang modagan isip kapitan sa Barangay Communal hulip kang Mark Galvez nga nagdesisyon nga dili una ipadayon ang ikatulo niini nga termino isip kapitan ug modagan na lamang isip kagawad sa maong barangay.

Sa pakighinabi sa Latest Davao News gibutyag ni Galvez nga mopahuway una kini isip kapitan kay gusto niini mag focus sa neosyo ug pamilya niini.

Gisaysay niini nga kung modaug isip kapitan ang misis niini dako kining matabang sa mga residente sa Barangay Communal kay graduado kini sa kursong business administration.

Gidungag ni Galvez nga naay sariling panlantaw ug istilo ang misis niini nga makatabang gayud sa mga residente sa Barangay Communal.

Sa duha ka termino ni Galvez isip kapitan sa Barangay Communal sa duha ka termino ubay ubay ka mga proyekto ang napatuman niini nga dako ug benepisyo sa mga residente sa Barangay Communal.

Halos tanang purok sa maong barangay sementado na tungod sa paningkamot ni Galvez.

Pinaagi sa diskarte ni Galvez ubay ubay ka mga negosyante ug subdivision developers usab ang nakasulod sa Barangay Communal ug nakahatag ug daghang trabaho sa mga residente.

Ubos sa liderado ni Galvez nakatagamtam usab ug kahapsay ug kalinaw ang maong barangay nga usa na karong sa mga progresibong barangay sa siyudad sa Davao.