Tungod sa paningkamot sa kasamtangang opisyal sa Barangay Communal, Buhangin, kasagaran sa away sa managsilingan sa maong barangay nihantong sa panagpasayloay ug wala na niabot pa sa korte.
Sa pakighinabi sa Latest Davao News gibuutyag ni Mark Galvez, kapitan sa Barangay Communal isip lider sa maong barangay naningkamot gayud kini nga maresolba ang mga bangi sa iyahang residente ug dili na kini mohantong pa sa kinasuhay sa korte.
Gisaysay ni Galvez nga usa ka datong sagpa kaniya kung dili niini maresolba ang away ug mohantong kini sa korte.
Isip usa ka kapitan, matud ni Galvez siya na mismo ang maghimo ug lakang aron maresolva ang gubot aron dili na kini mohantong pa sa korte.
Usa sa mga lakang nga iyahang ginahimo ang paggasto mismo sa iyahang kuwarta aron mabayaran ang utang sa isa niya ka kabarangay nga maoy rason ngano nagpatabang sa barangay ang usa pa niya ka kabarangay.
"Sa akong opisina naa dyud koy nakaandam nga kuwarta aron magamit kung naa may kaso sa utang, akong ingnan ang nangutang nga ako lang sa mobayad sa iyahang utang aron maresolba na ang away nila sa iyang silingan unya bayaran rako niya puhon aron dili na modako ang away," saysay ni Galvez.
Matud ni Galvez isip lider dapat flexible gayud siya aron mahatagan ug solusyon ang mga kaso nga ginadala sa barangay.
Kung batan-on ang nag-away matud ni Galvez kung makaya ginapa Jollibee nalang niya kini aron lamang dili na modako pa ang away ug maresolba kini.
No comments:
Post a Comment