Sakyanan sa Barangay Communal, Buhangin magamit nga libre sa mga residente nga naay importanteng lakaw

 

Gipakita ni Barangay Communal chairman Mark Galvez sa Latest Davao News ang request sa usa ka residents nga mogamit ug sakyanan sa barangay.

Usa sa mga prebilihiyo kung residente ka sa Barangay Communal, Buhangin mao ang paggamit sa sakyanan sa barangay nga libre kung naa kay importanteng lakaw or okasyon nga atenan sa laing barangay o gawas sa siyudad sa Dabaw.

Matud ni Mark Galvez, kapitan sa Barangay Communal andam mopahiram ug sakyanan ang barangay maski kinsa man nga residente nga manginahanglan niini.

Gisaysay ni Galvez nga katong residente nga buot mogamit ug sakyanan sa mga importanteng lakaw kailangan nga moadto lamang sa barangay hall aron mag proceso sa hangyu niini nga mogamit sa sakyanan sa barangay.

"Kung naa silay reunion o importanteng lakaw adto lang sila sa barangay aron magamit ang sakyanan," saysay ni Galvez.

Gibutyag ni Galvez nga willing sad mopahiram ug driver ang barangay sa buot mohiram sa sakyanan pero ang gastos sa gasolina abagahon sa mohiram.

"Willing ta mopahiram ug sakyanan sa unsa man nga okasyon ayaw lang sa outing" dungag ni Galvez.

Sukad nahimong kapitan sa Barangay Communal naningkamot na si Galvez nga makapalit ug makakuha ug daghang sakyanan ang barangay aron makapanerbisyo siya ug maayo sa mga residente.